Vaishvik Kurukshetra

21vi Sadi Ka Mahasamar Aur Samprabhu Bharat Ka Amar Hunkar

21vi sadi ka vaishvik paridrishya ek bahuaayaami 'Global Kurukshetra' ban chuka hai. Aaj yuddh keval seemaon par nahin, balki cyber kshetra, arthavyavastha, supply chains, takneek aur soochna tantra ke maadhyam se bhi lade ja rahe hain. Ye adrishya sangharsh rashtron ki samaajik, aarthik, saanskritik aur rananeetik samprabhuta ko prabhavit kar rahe hain.

Maanavta ke samaksh jihaadi, ugravaadi, mataantaranakaari aur vistaaravaadi vichaaradhaaraon ke saath vaishvik bhoo-raajneetik aur aarthik pratispardha bhi gambhir chunautiyaan prastut kar rahi hain. Aise samay mein keval kootneetik virodh aur rakshaatmak soch paryaapt nahin ho sakti. Vishva samudaay ko aatankvaad aur hinsak vichaaradhaaraon ke viruddh ekjut aur dridh rukh apnaana hoga.

30 adhyaayon aur 6 bhaagon mein vibhaajit yah granth aupniveshik maanasikta, rananeetik nirbharta aur vaichaarik sankoch se baahar nikalne ka aahvaan karta hai. Yah videsh neeti, raashtriya suraksha aur kootneeti mein 'Sacche Sanatan Yatharthvaad' aur 'Krishna Neeti' ka rananeetik drishtikon prastut karta hai.

Yah pustak shakti, aatmanirbharta, swadeshi takneek, raksha kshamata aur raashtriya hiton ko prathamikta dene par bal deti hai.Yah Bharat ke naagrikon, yuvaon aur neeti-nirdhaarakon se rananeetik aatmavishvaas, raashtriya samprabhuta aur ekjut prayaas ke maadhyam se Bharat ko ek ajey, samprabhu evam Vishwaguru raashtra banaane ka aahvaan karti hai.